角色表（2男3女按顏色分角）

Mee 女，約三十多歲。

明明 女，約三十多歲，跟 Mee 是中學同學。

Abby 女，約三十多歲，是明明及 Mee 的中學師姐。

Michael 男，約四十歲，Mee 同父異母的哥哥。

杰 約十五、六歲的少年。

小女孩 約八、九歲的女孩。

大佬華 男，約五十多歲，舊式街坊茶餐廳老闆。

娟 女，四十歲，Mee 在茶餐廳的同事。

莎翁校長 小學校長，明明學校的校長。

屈主任 明明學校的主任。

廢胎診所護士

心理健康評估員 男。

張太 女，約五十多歲。

男新聞報道員

女新聞報道員

Mee 母 女，約五十多歲。

分場表

第一場 心理健康評估

第二場 茶餐廳

第三場 廢胎診所

第四場 學校談政治

第五場 聚會

第六場 起義（一）

第七場 學校不談政治

第八場 起義（二）

第九場 簽名

第十場 夢

第十一場 熱升冷降

第十二場 團聚

第一場 心理健康評估

（心理健康中心面診室內，Mee 半躺在梳化上，與心理健康評估員對話。杰安靜地坐在角落，評估員看不到杰。）

評估員： 喜來登酒店？

Mee： 係啊。

評估員： 點解你咁想去？

Mee： 又大又靚囉！ — 其實我唔係幾記得點解嘞。總之就想去，但阿媽唔畀我去。

評估員： 你當時幾多歲呀？

Mee： 大概七、八歲啩，之後耐唔耐就會發夢見返呢件事。

評估員： （ 一邊寫紀錄）你媽媽唔畀你去，拉住你，話「呢啲地方唔係我地呢『廷』人去㗎。」

Mee： 係啊，跟住我睇下自己，踢住拖鞋，所以唔畀入 — 好似係噉。

評估員： 喺你夢裏面着住對拖鞋，定係你當日真係着住對拖鞋？

Mee： 夢裏面好似着住對拖鞋，真實嗰日⋯⋯我唔記得嘞。噉即是咩呀？有咩解釋㗎？

評估員： Well，由於你媽媽影響 — （想起）你媽媽仲喺道嘛？（看一看記錄）過咗身？過咗身幾多年？

Mee： 十幾年嘞。

評估員： 雖然你阿媽已經過咗身十幾年，但對你仍然有影響⋯⋯令你覺得自己係某一「廷」人，只係屬於某一「廷」地方。

Mee： 即是佢搞到我唔敢去尖沙咀？哈哈哈，講笑啫，我明你意思。即是你覺得佢令到我⋯⋯好多地方唔敢去⋯⋯甚至好多嘢唔敢做。

評估員： 可以噉講啦。

Mee： 但係噉喎，佢死咗咁多年⋯⋯仲有佢在生嗰陣，我地都唔係好親㗎咋。噉都有影響？

評估員： 無影響你就唔會成日發夢見到佢啦。

Mee： 噉又係⋯⋯（評估員不理會，繼續寫報告）咪住，噉對我嘅投票權有無影響㗎？

評估員： 好難講喎。因為呢類夢境反映你個人形象低落，有負面標籤，有可能導致情緒不穩，令你無足夠能力作出合適選擇 —

Mee： 咪住⋯⋯你講咩個人形象低落，係咪即是話我覺得自己好無用？

評估員： 類似啦。

Mee： 噉嗰啲咩能力作出合適選擇，係咪就好似⋯⋯有啲人簽咗約，簽完佢屋企人話佢其實傻嘅，合約唔算數，係咪噉呀？

評估員： 差不多啦。

Mee： 噉就無能力作出合適選擇？

評估員： 係啊。

Mee： 咪住，噉而家我去投票喎，去投票唔係揀自己鍾意嘅嘢咩？鍾唔鍾意無話啱定錯喎，有時你鍾意都無辦法㗎喎。

評估員： 政府唔係噉睇呢！如果唔係就唔使你地嚟攞心理健康證明啦。

Mee： 我個 friend 話啊，如果你月經嚟嘅時候嚟見啊，會話你躁狂唔適合投票㗎。

評估員： 你地女人有得投咪好囉，我地男人直情無份啊。

Mee： 噉又係 — 但係講返吖，你話我咩形象唔好，會唔會搞到我無得投票㗎。

評估員： 呢啲 case 應該問題唔大，你去攞投票證時「囈」下個選舉官，睇下佢畀唔畀囉。（ 看看錶）我出去搞埋你個report。你喺道等一陣。

（ 評估員起身離開。）

Mee： （ 看一看腹部，略有所思，突然想起）唔該晒啊，靚仔醫生！又會咁後生咁靚仔做精神科醫生嘅，唔做明星嘥晒！

評估員： （ 稍停，回頭）都話我係心理健康評估員咯！唔係精神科醫生咯！唔同㗎！

Mee： 咪一樣⋯⋯喂，拍硬檔，寫好啲我吖？

（評估員笑而不語，帶着筆記離開。Mee 稍為坐直身體，看着杰。片刻，二人會心微笑。）

Mee： （ 對杰）唔使擔心，我會帶你去喜來登酒店，或者假日酒店，或者半島酒店。你想去邊間都帶你去。

杰： 就算我着住拖鞋？

Mee： 而家有啲拖鞋好貴㗎，幾百蚊對㗎 —你放心啦，你要乜我都買畀你。

第二場 茶餐廳

（茶餐廳內，下午茶時間，茶客不多。收銀機前坐着老闆大佬華，Mee 穿着侍應制服，坐在收銀機旁閉目養神。另一侍應娟上前。）

娟： （ 對大佬華）又話炸髀剩二嘅？廚房話無晒嘞喎。

Mee： （突然想起）哎呀！頭先嗰檯客叫咗兩隻炸髀，我唔記得 mark 低。

娟： 喂，阿 Mee 姐你又玩失憶，你叫我點拆呀？

Mee： Sorry，sorry，等我嚟。

（ 娟讓 Mee 看紙仔，Mee 打電話。）

Mee： （對電話，態度熱情恭敬）喂？呢道栢園啊，係咪新翠九樓阿得哥呀？ —我係阿 Mee 啊，sorry，sorry，你咪叫外賣嘅，炸髀賣晒，叫過第二樣得唔得呀？ — 哎呀，唔好意思啊，我有咗吖嘛！大肚婆無記性啊，唔記得mark 低啊，唔關我同事事㗎 — 哈哈哈，你把口好鬼衰㗎 — 噉點啊，要乜嘢先？ — （ 一邊寫低）好，好，不如加多個西多士啦 — 得嘞，我一定請你食薑醋 — 哈哈哈，好，多謝幫襯栢園，好快送到！（收線，對廚房大叫）廚房，唔該頭先外賣張單，兩隻炸髀改兩個炸雞翼沙律，加多個西多士。

娟： （看着 Mee，有點不可思議）你⋯⋯又識佢㗎？

Mee： 無嘢，新翠九樓，之前送過幾次外賣，嗲過幾句嘛。佢地有隻松鼠狗好得意㗎！

大佬華： 係咪你之前夜晚喺公園放嗰隻呀？

Mee： 咦，噉都畀你撞到！阿得哥個老婆整親腳，得哥又加班，咪託我幫手放狗囉！我無所謂啊，反正我都鍾意狗 —其實我同佢老婆啱傾啫，佢老婆都啱啱有咗，咪傾多幾句囉。不過你唔好周圍講啊，佢老婆怕 BB 小器啊。

娟： 我點會周圍同人講啊，你周圍同人講嘅機會大啲，係人都傾得一餐。

Mee： 唔係有乜好做啫，傾偈又唔使錢嘅！一陣個外賣等我去送！

（ 明明入，明明亦懷孕。）

娟： （ 見明明）送咩啊，你收咗工㗎嘞。你個 friend 到嘞。

（ Mee 跟明明坐下，娟想落單。）

Mee： 畀杯熱奶茶佢。

明明： 喂！

Mee：： Sorry，熱咖啡吖。

明明： 喂！大肚點飲咖啡奶茶啊！無見你咁耐，你好似無長大過噉嘅？成個細路噉！

Mee： Sorry，Sorry，凍檸水啦。

娟： （對 Mee）收嗲啦！大肚婆唔飲凍嘢㗎。熱檸水好嘛？

明明： 好啊，唔該晒。

（ 娟離開。）

Mee： 喂，我諗到個仔改咩名。

明明： 咁快知係仔？ — 講嚟聽下先嘞。

Mee： 叫阿杰。

明明： 嘩，你仲記住 Form 4 嗰個阿傑呀？人地而家可能變咗光頭大肥佬嘞。

Mee： 唔係企人邊嗰個「傑」啊，係木字下面有四點嗰個啊。我想阿仔好似塊木頭噉，四平八穩，下面時時都有四點水「廊」住，浮得起，唔怕沉嘅。

明明： — 下面四點係代表火喎，唔係水喎。你個木頭下面有火，成日燒住喎。

Mee： 係咩？

明明： 都叫你唔好成日掛住拍拖啦，唔聽書。

Mee： — 唓，n 年前嘅事。喂，講起 n 年前嘅事，我尋日做咗嗰個咩心理健康評估嘞，佢話我發夢見到我阿媽唔畀我入酒店啊，反映我咩自我形象唔好喎。你明唔明點解呀？

明明： 我係讀過下兒童心理學，但係佢嗰範我唔識喎。解夢，一兩個夢睇到啲乜呀，咩要心理健康至畀投票，啲民建聯去老人院車啲老人癡呆嘅去投票又唔見佢地 check 得咁緊！

大佬華： 喂，你地兩個大肚婆都去投票呀，噉而家呢個《廢胎法》你地諗住點投呀？

（ 娟入。）

娟： 梗係贊成啦！有着數點解唔攞呀？政府畀錢你去驗廢胎喎，人地話驗廢胎好貴㗎！

大佬華： 關你咩事啫，又唔係問你。你又唔去投票！

娟： 唓，我想㗎！要申請個投票證麻叉煩，又要工作證明，又要咩心理健康，仲要親友證明，我啲屋企人喺晒大陸，點攞呀？麻叉煩！費事！（對Mee 及明明二人）你地兩個就唔同嘞，邊個父母唔望子成龍啊，驗廢胎可以驗到個細路聰唔聰明，讀書叻唔叻喎，而家仲有得免費驗，正啊！

大佬華： 免費免費！我聽到呢兩個字就火滾嘞！政府畀錢，噉即是邊個畀呀？即是我地納稅人畀啦！而家仲要搞個咩全女公投，男人無份投票，我想投反對票都唔得！不知所謂！如果呢條法案通過咗，我就一於加價，整個廢胎附加費，嚟補貼我嘅損失！

Mee： 大佬華唔好勞氣！我而家仲爭個乜鬼嘢親友證明啊，都唔知申唔申請到個投票證。

娟： （ 忍笑）使唔使老闆扮係你老公簽咗佢？

大佬華： 我叉住你把口咩！

Mee： 我仲有個阿哥喺香港嘅，我搵佢得㗎嘞。

娟： 你仲有個阿哥咩？無聽你提嘅？

Mee： 少聯絡嘛。